- 299 -

1374. Mai 31. Liegnitz.

Der Stadtrichter und die Schöppen bezeugen eine Güterabtretung durch Hanko Heseler an seinen Bruder Hans.

Ich Bernhart Gore richter von der stad wegen zu Legnicz vnd wir scheppen do selbist Nickel Heyner, Merten Kowel, Nickel Dirskewicz, Hancko Weller, Johannes Cranch, Petir Hertil vnd Hannus Scharzchuch bekennen, das vor uns in gehegtim dinge Hancko Hezeler hat off gegeben Petern Hezelern, syme bruder vnd seynen geerben seynen hoff, den her had an deme Ringe gelegin vnd seyne kawfkammer, dy her had vndir den kawfkammern gelegen vnd seynen hoff mit den schewnen vnd mit dem leymhawse vnd mit alle seynen czugehorungen, den her had vor dem gawltbergisschen thore gelegen vnd acht ruten erbis, dy her czw Smochwicz, vnder der stad Legnicz rechte gelegen, had. Vnd do czw alle seyne farnde habe, dy her idczud had ad er vmmer her noch gewynnet vnd wo her dy had vnd haben wirt, is sey an schulde ader an andir farnder habe, welcherley dy ist vnd seyn wirt, domitte zu tuen vnd czu lossen. Des czu bekenthnisse haben wir desin brif gegeben, dorobir vorsegilt mit vnsirn ingesigiln. Das ist geschen in dem dinge an des heiligen leichnams obinde, noch gotis geburt tawsunt dreyhundert iar in dem viervndsebenczigisten iare.

Liegn. Arch. Act. No. 1256 p. 14.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866